النقاط
118
الحلول
0
- إنضم
- 2021-10-11
- المشاركات
- 54,439
- مستوى التفاعل
- 19,095
- النقاط
- 118
- الإقامة
- مختبئه خلف الغيمات
بآخِرِ الأنفاس آنه اليوم يا خُوتِي
ما أظَن تِرضون غُربَة ٱتشِيل تابوتِي
بالغُربة وأحمِل حَسرَات مَحّد إلِيّة
ـــــــــــــــــــــــــــــــــــــــــــــــــــــــــــــــ
يَرَيت ٱهنانَة چِنتوا ولو تِشوفوني
ٱنطُبَگ جِلدِي ٱعلَعظمي وما تِعَرفوني
الحِزِن بَچّاني حَتّى ٱنحُفرَت ٱجفوني
الهَجُر سَهّرنِي لَمّن غَارَن ٱعيوني
تانِيت ٱشكِثُر بَس ما إجيتوني
رِدِتكُم خويه هاللحظة تُوَدعوني
آه لو تِدرون خويه ٱشصار بَحوالي
نايِبة وآلام والأحزان تُبرالي
ضَيم وخَوف وحَرگ ٱخيام بالغاضِريّة
ـــــــــــــــــــــــــــــــــــــــــــــــــــــــــــــــ
أسولِف ما أسولِف خويه مِحتارَة
دِلِيلي ٱمنِ المُصايِب تِستِعِر نَارَه
عَلَىٰ ٱخيامِي عُگُبكُم صارت الغارَة
أصيحَن يا علي وعيوني تِتجارَة
نِساوين ويِتامى وما كو كِل چارَة
وطُبَع سَوطِ الشّمِر بِمتونِي آثارَه
خويه والأطفال بالغارات سِحگوهَه
والخِيَم بالنّار بالأحقاد حِرگوهَه
أندِب يا طٰه المُختار وَصفِج بِدَيّة
ـــــــــــــــــــــــــــــــــــــــــــــــــــــــــــــــ
آنه اللي عِشِت كِل عُمرِي مَصيونَة
ولا شافَوا خَيالِي بخِدري مَكنونَة
الشّمِر تالي عَلينَه ٱتلافِت ٱعيونَه
بَناتِ المصطفى وبالطّف يِأسرونَه
وكَلام الما يِصير ٱنسِمعَه سَمعونَه
وعَلى النّوگ الهِزيلَة خويه أخذونَه
وبِالدّرُب لوعات بالآلام شِفناهَا
ٱمگطّعَة الأجساد عالتّربان عِفناهَا
مِن فوگ الهَزلَة الدّمعات عَالخَد جِرِيّة
ـــــــــــــــــــــــــــــــــــــــــــــــــــــــــــــــ
أميرَة وهاشمية بخِدري مَعروفَة
رَاوَتني المُصايِب دِيرَةِ الكوفَة
ولا واحد شَهَدها ولاهِي مألوفَة
أسيرَة وبِالحَبِل عِلوِيّة مَچتوفَة
عَلَىٰ طولِ الدّرُب دَمعاتِي مَذروفَة
جَرِحنَه بالگلُب ما نِگدَر ٱنروفَه
رِحلَةِ الآلام كِترِ الشام وَدّونَه
حَتّى مِنّ النّوح يا وِليان مِنعونَه
نِسوة ونِدخِل أرض أجناب شيعة أُمَيّة
ـــــــــــــــــــــــــــــــــــــــــــــــــــــــــــــــ
يا خويه بأرض غُربَة المَرار ٱنضوگ
وعَلينَه ٱمنِ الحِزِن تِبچي وتُوِنّ النّوگ
أباوِع للعِليل أمدَمّي مَتنَه الطّوگ
يِوِنّ ٱمنِ الألم ومنِ الحِزِن مَخنوگ
أشوفَه بالهَضُم للجامعة مَشبوگ
رَبيباتِ الرسالة وطَرّرونَه السّوگ
شِفنَه عِدهم عِيد هاي الناس مَسرورَة
لو بِچيت ٱدموم آنه بهاي مَعذورَة
مِن عگب العِز بين أجناب زَينب سِبِيّة
ـــــــــــــــــــــــــــــــــــــــــــــــــــــــــــــــ
يخوتي بعَيني دنياي أصبَحَت سودة
أطُبّ المَجلِس وشِمّاتي مَوجودة
أشوف إبن الدّعِي وبِيدَه لِزَم عُودة
يضرُب رَاسَك الغالي عَلَىٰ ٱخدوده
صِحِت وَينَه الكِفَلني برَايِتَه وزودَه
أبو فاضل أبد ما يِخلِف ٱوعودَه
آنه أخِت عَبّاس وِخت حسين هِضموني
بالخَرابة ٱهناك وَيّه أيتام خَلّوني
فوگ الرّاس بشَهگة موت سِكتَت رُقَيّة
ـــــــــــــــــــــــــــــــــــــــــــــــــــــــــــــــ
بدَمِع يِجري ومَرارة خِلصَت أيّامي
الحِزِن سَلّانِي خويه ونَحّل ٱعظامي
تِلازِمني صُوركُم حَتّى بَحلامي
أنسَى وذِكرياتي تهَيّج آلامي
بأذانِي ٱترَدّدَت صَرخَة طِفِل ظامي
وتِصير الفاجعة كِل لَحظة جِدّامي
بالطّفوف الرّوح ظَلّت غاد وَيّاكُم
أنتِظِر وبشوگ يالأحباب ألگاكُم
خويه ٱتمَنّيت ٱتحِضرون وَكتِ المِنيّة
بالغُربة وأحمِل حَسرَات مَحّد إلِيّة
ـــــــــــــــــــــــــــــــــــــــــــــــــــــــــــــــ
بقلم الأستاذ / ستار عذاب الحچامي
