إملاگه إرموش تعبانات ملگاك
من تتعب صدگ تتلاگه وياي
وكت عودك نشط للغربه تنحاز
ومن عودي انكسر ما شفتك إحذاي
تچفي بماي روحك لل يبيعوك
ولا چنك عرفت إگليبي شراي
ترفس بالگلب ما چنه حاويك
ولا چن إعلمودك ترجف إعضاي
بشلونك أدوّر حجه أحاچيك
وتطعني و تگلي إشلونك بهاي!
بكلهن عزبتلك ، ظهري و الحيل
لخاطر خنجرك عزبتك إگفاي
شصار و حزمت روحك للوداع
رحت و اتحزم الدخان جواي
اصيرن نار اشوفك بالحطب هاد
كاغد من اصيرن تنگلب ماي
بعنادك نهيت الما بديناه
وبعنادك نهيت الما بعد جاي
