الوطن عنده عتب كبر الجبال ألبي
وجبال المعاتب منه مسموحه
مجروح الوطن وجروحه تنزف ناس
ونهرينه تون من شدة جروحه
من زاخو لعد بغداد والبصره
صارسنين ينحب مابطل نوحه
الوطن يبچي الحضارة وضحكة الأطفال
الباگتها الليالي وهي مذبوحه
الوطن يبچي اليتامه الماتنام الليل
سهرانه تضل بدموع مسفوحه
الوطن يبچي الأرامل يبچي للمظلوم
وأظن حگه يصيح بجمره مجدوحه
موكافي ذبح موكافي هل تفجير
موكافي تضل جروحي مفتوحه
موكافي العراق يضل يصيح بصوت
وينه إلي يگوم وينهض بروحه
أريد ابن العراق الماتهزه االريح
يهز تابوت موته ويكسر اللوحه
لان گلب الوطن مجروح من أسنين
وعيون الغدر عالشعب مشبوحه
هانت ياوطن راحت ليالي السود
ونكشفت ألغمه وگامت الصيحه
ابشر ياوطن شعبك يصيح بصوت
اولادك اجت صدور مشروحه
اتدوس أعله المنايه ماتهاب الموت
واحدهم الك مايبخل بروحه
ياخذ ثارك ويفني الذي يعاديك
ودارك من جديد يشيد صروحه
شعبك ياوطن رغم الجروح ألبي
ورغم اصوات عدوانك المبحوحه
يضل اسمك عراق شما تمر سنين
فخر كل العرب والقصة مطروحه
لان بيك الوصي حيدر علي الكرار
وبيك أنوار ألاه ومنبع الدوحه
------
الشاعر هاني حماده البلداوي
13/ 5/ 2007
