مجالات أخرى السلام على الامام الحسن العسكري

[قارورة وفه]

قوانين قسم حصريات الشباب

قرأت القوانين واوفق عليها

سامره هذا اليوم تشهد مصيبه
بيها الحسن مسموم والله عجيبه
بسم النواصب طاح والناعي صوته صاح
والله عجيبه
***
سٲلت ناعي المصيبه ياخبر عندك
ليش بهل البريه هايم الوحدك
وليش بلا سبب دمعاتك بخدك
شنو فاگد عزيزك لو جرح ضدك
لودهرك غدر بيك وصرت وحدك
ياعظم المصيبه الوجرت وجدك
فكري تحير وياك جاوبني اترجاك
والله عجيبه
***
مشه الناعي ومشت روحي على ممشاه
امل عنديي جاوبني سبب بلواه
وعلى طول الدرب ٲنفاسه تزفر ٱه
وتشهك بالنفس وناته واويلاه
كل ونه اليونه االدنيا تنعى وياه
وسماوات العلى قبل الارض تنعاه
ناديته بدمعاتي وجروحي واهاتي
والله عجيبه
***
صحت يالناعي بالله لاتحيرني
على الصاير دخيلك بالله خبرني
يناعي النايبه بسك تمرمرني
انه مثلك مصاب العندي دمرني
وماناسي الليالي لاتذكرني
اريد الله على مصابي يصبرني
جاوبني بدموعه وشفته نخطف نوعه
والله عجيبه
***
ترجيته يخبرني بسبب حزنه
والياشده يبچي ويجذب الونه
جرت دمعاته حمره وزادت العنه
السامره اخذني الناعي وتعنه
يم قبر الحسن مثل الطفل چنه
صاح بصوت بالگوه اسمعنه
ينعى وحچيلي جروح جرحت گلبي المجروح
والله عجيبه
***
بده بجرح المصيبه اليجرح الاحساس
وحتى اليرضع يشيبه ويعجب الناس
يگول الناعي گامت كل بني العباس
عداوه للحسن كنة فلا تنقاس
سموه النواصب حت قطع الانفاس
ورجعو فجروا قبره بحقد الارجاس
مظلوم الحسن مات وتشفت الشمات
والله عجيبه
***
جرح وادي الطفوف وشدة اسبابه
يناعي الفاجعه ما ينسي اصوابه
بعد ناره بدليلي جمره لهابه
وعلى صوت النعي دمعاتي سچابه
العذر للعسكري من اوگف ابابه
انوح اعلل ذبيح ودمه وخضابه
لحسين دموع العين دم تجري اليوم الدين
والله عجيبه
***
بقلمي
الشاعر هاني حماده البلداوي
30- صفر – 1441هجريه​

 

[Daleen]

احسنت شاعرنا الكبير
جعلها الله في ميزان حسناتك

 

[هدير الامواج]

سلمت أناملك على طرحك القيم
وسلم ذوقكـ على حسن الانتـــــــقاااء
بـ إنتظآر جديدك وعذب أطرٌوحآتك
تحيتي وتقديري