خليل العارضي
تعال نگلب الزلات ونشوف
ياهو البيهن إعلى الثاني بادي ادليك إعلى سچة شوگ وتميل
تحب وياي تمشي بغير جادي
اگبعك سكته من الگاك غلطان
وإذا اغلط تگف وگفه وتنادي
إعلى نقطه بلوني الأبيض ضجه سويت ولاچنك ولك لونك رمادي
تمشيني إعلى مايك بالهوه تريد
تشد بكيفك وتگطع ودادي
عنيد وتحرگ الجو لوعلت بيك
وتعيل انته واگلك يله عادي
علي لوجار وكتي تخلي وتصير
إعلى صفحه وتتخذ موقف حيادي
وأنه لو مر هوا واذاك مانام
وتلگاني الصبح معلن حدادي
وفي عكس اتجاهك ماصرت يوم
رغم مرات بافعالك معادي
أبد ردة فعل ماعندي وياك
اشتسوي وياي تلگاني اعتيادي
عفتني ورافگت ضعن اليكرهون
وعلى عنادي صرت للنوگ حادي
وبعد مابذرت كل ذيچ السنين
گلت راح انصلح منا وغادي
على كلن يظل بعيوني ملگاك
بلسم جرحي ودواي وضمادي
وقياسا بيك كل الوادم أغراب
ولاغيرك بشر يسكن فؤادي
