صبحكم الله بالخير
قبل شهرين أجانه طالب منقول من متوسطة ثانية، بسبب مشكلة صايرة وياه هناك. إجا وهو حالته حالة، متضايق، حزين، مو متأقلم لا ويا المدرسة ولا ويا الطلاب ولا ويا الكادر، ودرجاته هم ضعيفة.
ظلّيت وياه خطوة بخطوة، أتابعه، أهدّي خاطره، كل ساعة أحچي وياه. حتى بالليل يخابرني يدز أسئلة وأجاوبه. المهم ما خليته وحده. ونتيجه متابعتي واهتمامي بي
صار وضعه النفسي والدراسي زين
أمس إجه أبوه، والولد جاب ٨٥ وتحسنه واضح. اليوم خابرتني أمه تسأل:
شلونه حمودي ؟
گتلها: لا لا لا، متحوّل ١٨٠ درجة، صاير ممتاز.
گالت: إي والله أستاذ، الفضل لله وللشيخ.
گتلها: شيخ شنو؟
گالت: لا… الشيخ الفلاني، عطانا حرز وماي وقرا عليه وتفل بيه، گال اشربوه قبل الامتحان وشوفوا النتيجة.
جان بالچذب طيّبي خاطري بدعوة كريمة 
يعني بعد كل هالتعب والمتابعة والتدريس والسهر…
يطلع التدريس يتراجع
والتعب يتراجع
والشيخ ويا التفلة ينتصرون 
بس هم شي حلو، المهم الولد ارتاح ونجح… والباقي الله كريم 
