غزل
مراقبة عام شباب الرافدين
- إنضم
- 2021-10-11
- المشاركات
- 45,954
- مستوى التفاعل
- 16,276
- النقاط
- 117
- الإقامة
- مختبئه خلف الغيمات
- جوهرة
- დ297,051
- الجنس
- أنثى
روحچ بسيطة، همومچ زغار
وبيچ العشگ، ما جرّب النار
أدري الزغيرة، إتَيّه الاعذار
بس آنه اشوف بعين جبار
…..
من چان گلبچ لا أُبالي
وچانت احلامچ بالعلالي
بليلة من ذيچ الليالي
جبار، فك گلبه وحچالي
….
گال انتظرها، وما أمِلها
واضفر همومي، وما أفِلها
وافتِگ جروحي، وما أشِلها
وعود من اموت، اكتِبهِن الها
…..
گلها الوكت ما چان بيده
ولا روَّض احلامه البعيدة
يا نجمته،
ويهلال عيده
جبار مو شاعر … قصيدة
……
گلها آنه ابن أم، شوگها صواب
من تخبز، التنور محراب
آنه ابن فوطة متانية ابّاب
وچرغد سِلِم، (والسيف چِلّاب)
…….
حربين طاحن فوگ راسي
وصعدت على چتافي الكراسي
ما جاملت يوم السياسي
من كاسَرِت بالناس كاسي
…….
گلها آنه واحد … واحد بجيل
أزرع گصب، واحصد مواويل
من يندفِنْ حدر الكحل ميل؟
منين ألگه لعيونچ مراسيل؟
….
آنه الفقير الطاح بالبير
وضاع بمزادات النواطير
تدرين بالحيطان شيصير؟
الصور ثارت عالبسامير
…..
ترضين مالچ بالوطن دار؟
وتتحمّلين العمر طشّار؟
منّ المشط بزلوفچ يغار
مسودن بكلشي البيچ جبار
…..
جبار، يا حفنة نشامى
ينجرح، لو صادو حمامة
خد من بچي، وخد ابتسامة
ومغسول، بدموع اليتامه
….
گِلّلها گضّة الليل مهموم
طير وعليچ يدور ويحوم
كون القصايد، تلبس هدوم
چا فصّلتلچ غيم ونجوم
…..
گلّلها چفه يريد حِنّه
مجروح، ظل ينزف محنّه
شما طاح، يذبل لحن منّه
شاعر .. وصار طوير جنّة
…….
عشگي، العِشِگ يحتاج نشتاگ
يحتاج دمعة، بگد الفراگ
وضوگي، الحلم بالليل ينضاگ
وعيشي الحرامي… الليل بوّاگ
……
گلّلها جبار اشتهى الموت
من صار عمره بزندچ بتوت
جرفچ ذهب، والماي ياقوت
وكل حرف باسمچ، صار تابوت
…..
جبار، مو عايز جزالة
بس ذيب، مسكون بغزالة
من يرسم مراية بخياله
تنكسر بضلوعه الرسالة
