غزل
مراقبة عام شباب الرافدين
- إنضم
- 2021-10-11
- المشاركات
- 45,954
- مستوى التفاعل
- 16,276
- النقاط
- 117
- الإقامة
- مختبئه خلف الغيمات
- جوهرة
- დ297,053
- الجنس
- أنثى
استنكرت الفنانة حورية فرغلي الهجوم المتكرر الذي يطالها بمجرد صدور عمل فني لها أو حتى تصريح صحفي، مؤكدة أنها فتحت صفحة جديدة مع الوسط الفني بعد عودتها من رحلتها العلاجية الطويلة، ولكن هناك من يريد لها الفشل، وكشفت لأول مرة عن تعرضها للسحر هي والإعلامية ريهام سعيد في كواليس مسلسل "ساحرة الجنوب"، كما تحدثت عن كواليس خلافها مع النجمة درة.
وأضافت حورية فرغلي، خلال لقاء لبرنامج "الترابيزة"، المذاع عبر فضائية "الشمس"، مساء الأحد: إن حياتها "لُعنت" بعد مسلسل "ساحرة الجنوب"، لافتة إلى أنها حاولت التواصل مع الإعلامية ريهام سعيد، بكل الطرق لكي تخبرها بأن حياتها دمرت، كما حدث مع الإعلامية بعد حلقتها الخاصة بالجن.
تابعت قائلة: حاولت أكلم ريهام كتير جدًا، معرفتش أوصل لها، كنت عاوزة أقول لها أكيد عملنا حاجة، اتكلمنا في حاجة، أو مشينا على طلاسم وإحنا مش عارفين وده اللي أذانا"، بحسب تعبيرها.
ولفتت إلى أن وزنها بلغ 49 كيلو بعد الانتهاء من تصوير المسلسل، وظلت طريحة الفراش، وغير قادرة على الحركة طوال الوقت"، مشيرة إلى أنها كانت بحاجة لمن يساندها حتى تذهب إلى الحمام.
وذكرت أنها وجدت "عملًا" في منزلها، وقالت: "لقيت عمل في البيت عندي، زرعة كان في حاجة مدفونة فيها، فتحتها كانت ورقة شمع مكتوب عليها بالأحمر حورية بنت نادية تصاب بالمرض وتصبح طريحة الفراش ويقف جوازها وخلفتها ورزقها".
وروت عن واقعة غربية في اول أيام تصوير المسلسل، قائلة: "كنت بحط مكياج، الأنوار اللي على المراية كلها فرقعت، بقيت أبص لمساعدتي؛ لأن في حاجات بتحصل في الأوضة وبتفرقع".
وتحدثت حورية فرغلي، عن الهجوم الذي تلقته من قِبل الجمهور بسبب أغنية القطة السافلة، مؤكدة أن الجزء الخاص بها في الأغنية لا يوجد به أي لفظ خارج، مشيرة إلى أنه يوجد من يريد تشويه صورتها.
وقالت حورية فرغلي: أنا دلوقتي مش عارفة إذا كان غلط إني عملت أغنية القطة السافلة ولا لأ، في ناس بتقول أهو حاجة جربتيها وخلاص، وناس تقول مكنش المفروض تعملي كده يا حورية، طيب ما أنا عملت عبده موتة وكنتوا بتشتموني، وبتقولوا إزاي تعملي دور زي ده، الناس هاجمتني أوي ولكن بعد كده نجحوا الفيلم أوي.
وأضافت حورية فرغلي: أنا غيرت حياتي من ساعة ما جيت من أمريكا، أنا رجعت صفحة بيضاء وبختار الناس اللي تبقى حواليا، ولكن في ناس بتهاجمني، في حد عايز يقعدني في البيت، حد عايز يشوهني ويكسرني، في حاجة مش طبيعية.
وكشفت حورية فرغلي، لأول مرة تفاصيل خلافها مع الفنانة التونسية درة، بسبب فيلم "مصور قتيل"، والذي عُرض في ديسمبر 2012، وقالت إن سبب خلافها مع درة، هو طلب الأخيرة عدم وضع اسم حورية في الأفيش والإعلان الخاص بالفيلم، موضحةً: أنا في الفيلم ده تعبت فيه أوي وكنت حورية فرغلي بردو، وأنا وإياد نصار ودرة وأحمد فهمي، كنا في فيلم مصور قتيل، وهي طلبت إن أنا متحطش لا في الأفيش، ولا في الإعلان، والأفيش والإعلان اتعملوا وأنا مش موجودة، فأنا روحت شركة الإنتاح واتخانقت معاهم.
وأضافت حورية فرغلي: المخرج قال إن درة هي اللي طلبت كده، وبصراحة المنتج غير التيزر وغير الأفيش وحطني فيه، بس بعد ما أنا روحت واشتكيت، ودرة كان المفروض اسمها يتحط الأول ومكنش عندي مشكلة في ده..أحمد فهمي كان طالع جوزي ودوره كان أصغر من دوري، ليه هو ودرة وإياد نصار يتحطوا وأنا لأ؟، إذا كان أنا عنصر رئيسي في العمل.
وأضافت حورية فرغلي، موجهة رسالة عتاب للفنانة درة، قائلة: الفيلم ده كان بالنسبة لي أول خطوة أخدها في مهرجان القاهرة السينمائي، ليه بتسرقيها مني؟، أنا تعبت وصورت واشتغلت، ليه تعبي تحرميني منه؟.
وعلقت حورية على الضجة المثارة بعد تصريحاتها عن قاتل الفتاة الجامعية نيرة أشرف، وقالت إنها لا تؤيد إذاعة تنفيذ حكم الإعدام على المتهم محمد عادل، موضحة: أنا ضد أنه يدبح بالطريقة اللي دبح بيها نيرة قدام الناس.. عمرنا ما شوفنا الدبح، أنا شوفتها مرة في سوزان تميم، وكان منظر غير طبيعي، فلازم الحاجات دي الناس دايمًا تبقى خايفة منها، لما تبقى موجودة كده طول الوقت محدش هيخاف.
ووجهت الفنانة حورية فرغلي، رسالة لوالد ووالدة الطالبة نيرة أشرف، قائلة: البقاء لله، الله يرحمها، يمكن هي علشان جميلة وطيبة وأنتم راضيين عنها ربنا خدها صغيرة، وربنا دايمًا بياخد الناس الطيبة والكويسة بدري، بيستخسرهم في الدنيا، إن شاء الله هي في الجنة وقلبي معاكم.
التعديل الأخير:
