عينك بعيني وتچذب
شنهي عِذرك!
تذكر بآخر مَحطه؟
وچَفك بچفها غفه
انه مو شَمعه ولكن
ليش كل حَيلي انطفه!
ليش دَمعي الما نزل مره إعله غالي
گبالكم هيچ انچفه
چنت أخاف تروح مني
والخفت من عنده صار
انه تانيتَك لحد ما
زَهگ مني الإنتظار
انت قَررت الرحيل
وانه لسه بلا قَرار
انه عِشت بكل خَساره
وانت عِشت الانتصار
انه إلك غار الرسول
وانت للحلوات غار
انت من شاماتي أسود
وانه اضوه من النَهار
وهَسه گِلي
شِنهي عِذرك؟
انه منطيتَك عيوني
وانت گضيت العمر منطيني ظَهرك
انت بايعني ببلاش
وانه خايف لا أخسرك
انت كاسِر كلشي بيه
وانه خايف لا أكسرك
من بَعد كل هذا أريدن
سَبب واحد حته أعذرك
شِنهي عِذرك!!
[BGCOLOR=rgb(250, 197, 28)]- عذراء كاظم[/BGCOLOR]
