سالـــــــــــــــــــــــــفة.وربّـــــــــــــــــــــــــــــــــــاط
صديقي يگول أبوي من راد يتزوج بنهاية السبعينات , أخوه الچبير (الي هو عمي) راح يأجّر (كاولية) .. لان بنهاية السبعينات ماكو عرس بدون (شدة أو كاولية) فلما طب لبيت الكاولية لگه رجّال صاحب شوارب (يوكّر عليهن الصگر), معگّل ويدخّن وبيده أستكان چاي ويمّه صوبه علاء الدين وداير مادايره (الحبايب), يگول عمي شو هذا الرجّال أول ما شافني گام من مكانه وركض عليَّ وشبگني , والا شويه يبچي ويصيح (ياخويه يا ) !! يگول تعجبت !! گتله شلون عرفتني ؟؟ گال أنت مو فلان أبن فلان وبيتكم بفلان منطقة ؟؟ گتله أيه !! گال أني فلان أبن فلان چنت وياك بالجيش بحركات الشمال بحرب البرزاني !!! گتله أييييه والله صدگ ..وذيچ الگعده وشلون سوالف وذكريات وضحك وذاك السمچ المسگوف وچاي على الفحم والحبايب يفترن عليَّ . گال هسه گول شعدك اليوم هنا أني بالخدمة ؟؟ يگول أستحيت , گتله والله أني جاي أتفق على حفلة عرس بس خاف ما تاخذ مني فلوس ؟؟ گال لا بس راح انزّلك من السعر. يگول أتفقنا على السعر وعلى يوم العرس وعلى أساس يجي هو وياه أربعة من (الحبايب)..يگول (وهنا مربط الفرس) سألته شلون مدبرين حالكم ؟؟ يعني فترة شهر محرم لحد فرحة الزهره وياها رمضان ماكو أعراس ؟ گال هذا خوش سُعال (قصده سؤال) !! يگول أحنه حاسبين هيج حساب.. فأني متفق وي (الحبايب) عدنا صندوگ نذب بيه نسبة من فلوس الحفلات , بس (التفريعه) للحبايب هذا حقهنّ !! تعرف أني حقّاني وأخاف الله ! ومن يجي (محرم لحد فرحة الزهره) أحنه ناكل من الصندوگ , وبيني وبينك العباس أبو فاضل حتى نطبخ ثواب منّه وعايشن ذيچ العيشة !!! صديقي يگول هسه حكوماتنا من 2003 لحد هسه ليش ما سوّت النه صندوگ مثل صندوك الكاولية ولا مذلة (الديون الداخلية والخارجية من صندوق النقد الدولي وشروطههاي القصة مع الاسف بالتسعين حسبنا الله ونعم الوكيل
