أنته اجمل

[قارورة وفه]

چذاب احس بضواه الگمر
وملگون حيل لو طال السهر
يذرف دمع
ويشگ صدر أمنياتي
وشكثر يحلف
واعرف چذاب
يحجي بظهر
تَگلت أحچايتك أمس
بالصفنات وأنا اسمع
لگيتك أمفتگ
احشاشتي وبالمغامز ذاك
فتگت العمر
درت وجهي عله ظلك
لگيته شدت ياسمين
خفت أجيسه وأعطش
وأنته كلك نهر
وأنت رعيد يخوف بصيحاته
وأنه أشعلتلك شموع عمري
بزخات المطر
گبل لاتنش الغيمات مزنات العشگ
أحسك مورد خجل
وبدفتري ألگاگ بأول سطر
يا أول الضحچات
وياصفنة النعناع
وشهگة مستحة
تلم الروح فوگ
گطرات المطر
لا توادعني..
بالموادع أنسه كلشي
وبخدك أنسه عيني
وأگلك ليش تحب الفراگ
وانه إلك سولة بكل مشتهه
وفانوس وسهر
شكثر أملت بيك روحي
وشكثر واهس يمرني
بس يمر طاريك
لو جاني خبر
هاك أخذني فرح ليلو
لگذلتك
وصفن إعيوني
بترف نهدك والبحر
هاك أخذني
أچفوجي محتامات
تحضن البيك كله
وشفافي طبع بيهن
يبوسن بشفافك جمر
خصر ، خصرك
لو ليلة شته وحضره
ألم أشتاي كله
وأتكوم أنه وياه
بدورة خصر
دخيل كل الترافه البيك
لا تگلي واهسي تعبان
أكتبلك وأغنيلك كل الليل
وأحجيلك شعر
لاتظم رصعاتك
أحلفك بنهدك
وأحلفلك انه وياك
طول العمر
چذاب احس بضواه الگمر
أنته أحله
أنته اجمل
أنته بيت وصيوان
أنته سمه بلا غيم
أنته الگمر..​

 

[هدير الامواج]

الله عليك
ابدع

 

[سارة البابلية]

جميل ياغالي