أمحلت ياحيف ماظلش زرع بيها
أمحلت ياحيف نشفت كل سواجيها
أمحلت ذيچ الي چانت كل وكت خضره
أمحلت ذيچ الي چانت دومها مثمره
أمحلت وألضيم واطاها
أمحلت وألليل غطاها
وچن خيم عليها ألموت
فلا نجمه تشع ولا گمر يطلع
ولاحادي اليصيح ونمشي عالصوت
أمحلت ... وألناس ... چن الناس ... موش الناس
ذيچ ألي تشيل ألراس
ذيچ ألتعرف المعروف
ذيچ ألماتعرف ألخوف
ذيچ ألتحضن ألراية وتشد عالجرح وتگوم
لو كثرت عليها ألگوم
أمحلت ياحيف ماظل بيت , ماظل بالنزل ديوان
بعد ما تسمع ألهاون يرن , ولا ترى ألفنجان
يلمع , و ألنزل زاهي بشبابه , وألزرع ريان
يلمع وألسنابل ذهب , و ألنهران
ترگص و ألفرح مانكدر نلمه
شع بعيون كل ألناس , نور وبدد ألظلمه
شع بعيون كل ألناس , خير وما بعد غمه
أمحلت ياحيف ماظل بلنزل رعيان
ولاظل زارع أليزرع
ولا منجل يغني ولابعد نيسان
ولا مسحا ألتشگ ألگاع وتعيد ألخضار ألراح
وتخلي مناجلنا تغني ويرگص ألمرواح
أمحلت ياحيف .. ألف ياحيف .. لاچن ما كطعنا أياس
أمحلت و ألزلم .. بيهم زلم .. بيهم من يشيل ألراس
چثيرة وداعت ترابچ و مايچ من زلمنا سباع
چثيرة سباع ماتكفر لون تطبگ عليها ألگاع
تامن بلأرض و ألماي
تظل تشگ سواجي ألخير و أتاني ألربيع ألجاي
تأمن بلأرض و ألماي
تظل تشگ سواجي ألخير و أتاني ألربيع ألجاي
هنا يلگاع يم ألخير
يم ألبشر, يم ألزرع , يم ألماي , يم ألطير
جليلين ألوفه عافوچ
كلو خيرچ أو وكت ألضيچ , راحوا كلهم وخلوچ
ماچنهم تربوا بيچ
خافو من ظلام ألليل وچلابه
گالوا مايروح ألغيم
ولاينزاح عنا ألضيم
ولايطلع گمر بالليل
ولاينشاف نجم سهيل
گالوا مايجينه ألفجر بأنواره وتباشيره
ولانسمع صياح ألديچ
ولاتغيش ألحلابه
ولاذاك ألربيع أيعود لحبابه
كالوا مايجينا ألماي وتريع ألعطشانه
ولاجني وأخوتي وياي
ولاجني و أخوتي هواي
لاجنه وحك عيناج ماننسه ألملح و ألزاد
وننگاد للعافوچ .. ماننگاد
مانمشي ونعوف گبور موتانه
مانرحل لون نسگي ثراچ بدم
لون ليلچ يصير أظل چثير أظلم
لون كل ألعروگ ألبيچ صارن سم
لاچن مايصيرن سم
عيب أنعوفچ أوننساچ لوناكل صخر وجذوع
عيب أنعوفچ أو ننساچ لونسكي ألجهال أدموع
عيب أنعوفچ أو ننساچ مامش مگبره من ألجوع
لن عروگ بيچ طوال .. حيل طوال
مايبعد عليها ألماي.
ولاتگدر تهزها ألريح لوهبت عواصف موت
خلي تهب عواصف نار
خلي تهب صخر وحجار
خل تصفر بعالي ألصوت عروكچ هاي ماتيبس .. عروكچ هاي
نشتل كل ثراچ ضلوع
ماتيبس ولاتصفر
ولايثر عليها ألحر
تظل تبرعم وتفرع .. وهم يطلع ورد بيها
وتظل آمآل كل ألناس مثلي معلگه عليها
لا وحگ كلمن طاح منهم يسبح بدمه
وحگ ألنور وسيوفه ألتشك جيد ألليالي ألسود
وحگ حيلي .. وحگ مسحاي
وحگ ألزاد و ألنعمه .. وحگ ألماي
وحگ ألسنبل المنضود
وحگ كلمن وكف ماعاف گاعه ولا فتر عزمه
وحگ ألناس كل ألناس من ترفع روآيآها
وتنهض شاده حزامين , تطلب ثار موتآها
"ما أبيعك يطوگي و ألبشير يلوح "
"ما أبيعك و ألملگح على روس ألنخيل يلوح "
ما بيعك لون ألروح مني ومن خواتي تروح
وما نملك وحگ ألگاع و أهل ألگاع غير ألروح
لابد ما يجينا ألصبح وينور فيافينه
لابد ما يجينه ألخير بأوراده ورياحينه
ويروح ألليل وأهل الليل وألخافوا ظلام ألليل
لابد ماتجي ألزوده ويفيض ألماي
وتربعين وتريع ويآچ ألناس
وتردين مشتل للورد و ألياس
روعه 