ابوذيات بقلم شعراء

[قارورة وفه]

يروح الروح للمحبوب شهدي​

انا النحلة النحيلةوخلص شهدي​

حرت للغالي غير الورد شهدي​

الورد بس للورد يصلح هدية​

========​

مرمرني هواك وهمت بالهم​

وعلى فراكك كضيت العمر بالهم​

طفل ولبست تاج الشيب بالهم​

وصرت عجبه المثل ينضرب بيه​

==========​

يعلمني زماني دروس وانسه​

وراح الچان الي بدنياي ونسه​

تگلي اترك هوانه دوم وانسه​

شلون انساك وانته الزاد اليه​

=======​

شمع شخصك شهب شعشع شمايل​

شمع شايل شبه شامت شمايل​

شمل شترك شجافيكم شمايل​

شعوفنكم شمايلكم شجيه​

======​

بعتني و اني احبك و انت شاري​

حبيبي انت شهرتي و انتشاري​

على يا قبله ذبحتني و انت شاري​

و حتى بسم الله ما سمه عليه​

==========​

هلا يل مانساك الكلب مره​

وصدك كل ليالي اجفاك مرة​

شيضرك بالحلم لو تمر مرة​

عزيز انت وتضل غالي علية​

========​

زمان الجان يزهي كبل مادام​

وبجيت عله الخدود الروح مادام​

عكبهم كلت اسم الروح مادام​

مشوا عني بعد جا شلي بيه​

========​

سكيت عقول ناسي مي ديانة​

وما احب هاي الاسامي مي ديانا​

احب الي تكول ميديا انه​

واكلها هذا اسمج عم عليه​

=========​

الحلو ردنا يجينه بس ميانه​

و ابد ما ردنه كوه بس ميانه​

اريدن طابو كلبك بأسمي انه​

عقار اسحب عليه و ابني اليه​

=======​

صرت مرهون حبك ونت راهن​

اوتعال وشوف هجرك ونت راهن​

يجي يوم ان توجه ونتراهن​

منو اكثر ايحب ويود خويه​

=======​

كظاني بسيوفه وعيوني تراهن​

وكصه بيه وعلى جروحي تراهن​

اكله انساك ويكلي انتراهن​

انته تموت بس تبعد عليه​

========​

كلبي ما فرح عكبك ولا سار​

وجدمي ما خطا الغيرك ولا سار​

اخبرك ما بقت كلمه ولاسر​

فضحني الشوك والحب مو بديه​

==========​

​

ألف دنياي كلها ماتلفني​

عنيد وغير شخصك ماتلفني​

عمت عين المنايا ماتلفني​

اهز دنيه ومره تلعب عليه​

=========​

لوه ايدي حبيبي اشلون لويا​

وجنت افرشله روحي ابساط لو يا​

زاي القصرت وياك لويا​

ولونها الدال احذفها بديه​

======​

أنة ألشديت جرحك ليش حليت​

عليـة وحلـة ألطـلاب حليت​

ذكرتك بأمتحاني وغلط حليت​

شجاوب وأنت شاغل حتى أدية​

=========​

لاذ بكلبي شوكك وانتقل بي​

صعد للراس حبك وانتقل بي​

احب اشلون غيرك وانته قلبي​

وانه بكلبي احبن مو بديه​

========​

جفي للمشو بالليل يوماي​

واكضي شلون من ترحون يوماي​

نزل علخد سواد العين يوماي​

يوهي اثنينهن طاحن سوية​

=========​

البدر زور صفاتك وانتحلها​

واعرفت ايام هجرك وانتحلها​

وعليك اعرض قضيتي وانت حلها​

وانصف لو ردت تحكم عليه​

========​

على حبك باب الكَلب سكّر​

يالتنكَط مسك شفتك و سكر​

حقك لو تصاب بمرض سكر​

إذا كلك عسل و محير البرية​

========​

يهل تنشد لحالي حالفاني​

وبس الحزن بعدك حالفاني​

ابد ما احب غيرك حالف اني​

وجدت روحي الك بثنين اديه​

========​

عيوني ماترى لغيرك تراباك​

زين ومن اصل طيب تراباك​

طينك اخذ من يوسف تراباك​

اكص بيدي لون تمر علية​

=======​

طعم طيبك يغالي عسل وي جوز​

ومنك مايتوب الكلب و يجوز​

تريد انساك بس بالموت و يجوز​

تلمنه الاخره ونرجع سويه​

========​

أحبكـ مو لاجل حسنك و مالك​

و الحب حلال برأي حنبل و مالك​

إذا انت غزالة بلاية مالك​

شلون تريد اعوفكـ من ادية​

=========​

زلازل ماتهز كلبي ولعصار​

وطحن ماأثر بحالي ولعصار​

لجن حاله اصبحت عندي ولعصار​

تذوب الروح من تجبل عليه​

==========​

وحك من نزل الايه وسنها​

حلوة برصعه خدودها وسنها​

الدنيا افرحت من حتي وسنها​

بشاير طشت بصبح ومسيه​

============​

ذاب الكلب من بعدك حركته​

وبين كل قهر حبك حركته​

وكٌف هلكون من شافك حركته​

وطش النجم روحـه واهليه​

=======​

منك ما يضوج الكلب ويميل​

وعنك ما يزيغ النظر ويميل​

اكطلعك مسافه متر وي ميل​

ولا اتعب واكول شلون بيه​

=======​

بعد ماراح ارجعلك وردلاك​

ودلوي لاتظن اذبنه وره دلاك​

فرشت سنتين من عمري ورد لك​

الجنيته اشواك منك والاذية​

=======​

ياهل واضح ولا بين وهم بيك​

بيك الليل بس اصفن وهم بيك​

وبيك الحسن ميزة وهم بيك​

حنين واحن من امي عليه​

======​

ياماحار كاسك شربته ياما حامي​

ولاجلك ياما ادافع ياما حامي​

قضيتي ياقاضي اليحلها يامحامي​

احنا ثنين والعدوان مية​

========​

تهت مابين سكتنه وسكته​

الهجرني بضيم رجعته وسكته​

العمر خلصته بس نظرة وسكته​

سكت وردت عيونك عليه​

========​

الدمع ضل يفرك بخدي ودلك​

ومشيت وياي ماتدري ودي الك​

ياهو الجابك لگلبي ودلاك​

تهت بس روحي الدور عليه​

=======​

هلة يالابس الجوزي ويه ابيض​

وانة من سنين ماشايف وية ابيض​

يكاكي الديج لو شافك ويبيض​

وتبوس جدام رجلك كل وطية​

=======​

الگلب ضل بس اهو وحده ورباه​

يتيم وماله واحد ورباه​

منو مثلي اخذ جرحه ورباه​

وكبرنه على القهر سوية​

==========​

احب صوتك واحب للعود دكات​

وزماني شلون اله وياي دكات​

وخلص كلبي وماظل بعد بيه دكات​

وترد روحي من يمر اسمك عليه​

=======​

​

نهض غمن جديد وغيم بالجو​

تبشبش خاطري وافرحت بالجو​

متى ما الصافات البيض يولدن بالجو​

هـــذاك اليو تاننسه الاحباب​

=======​

روحي من الصغر عالضيم ولعت​

وبعد متحمل الجرات والعت​

تذكر قبره للدلال ولعت​

شبت من سكنت ارض المنية​

=============​

يدنيا اش بيج بس تعلين وكري​

تذبيني وارد النوب وكري​

تعرفين بطرك بلور وكري​

عجب سجيل همج بس عليه​

==========​

وكًع كًـلبي بغرامك ماتشيلة​

وترى كلبي التعذب مات شيلة​

اخابر وانتة تسمع ما تشيلة​

وينك يا حلو بس رد عليه​

=======​

شبصرك بالاخذ عقلي وفر بي​

وعمده على الجمر حطه وفر بي​

ليش الافرح بجيته وافر بي​

يحط بالضهر سجين بيه​

==========​

اضل سنين اودك وانت غالي​

بعت عمري واشتريتك وانت غالي​

كل الناس ترخص وانت غالي​

غلاتك اغلى من روحي عليه​

=========​

هبة ربي وهديته وانت منه​

صرت شريان كلبي وانت منه​

خل احنه نتامل وانتمنه​

نعيش احنه العمر كله سويه​

===========​

​

الوادم تنظر لجسمي يروحاي​

وانه موتاتني سكته يروحاي​

ليش وبالعجل طحتي يروحي​

خلص صبرچ يروحي وخنتي بيه​

======​

أنا دلولي نحر بيا البــين يسعى​

ثقل همي ولالي صـــدر يسعى​

اليغص بالزاد أهو للماي يسعى​

وانا بالماي اغص أشــــنون بيه​

======​

سفن شوكي مشن بشطوط ونهـار​

ونفذ حتى صبرها الروح ونهــار​

احن الشوفتك كل اليل ونهــار​

اتمنه اشوفك واحجيلك البيـــه​

===========​

اشبدة مني وشخصك علي ما طال​

وحبل مواصلك وياي ما طال​

دليلي ويا الصبر بجفالك ما طال​

مثل روح التماطل بالمنيــــــــة​

=======​

صرح للحب اريد ابني وقلعة​

واشيل الحزن من كلبك وقلعة​

احب بغداد والبصرة وقلعة​

واحب كلمن سكن بالناصرية​

============​

سمر واملح وجهنا مالمعن​

اوكتنا شبيه يضدنا مالمعنا​

حبيبي النضر عكبك مالمعنا​

شيفيد الشوف من تبعد علية​

============​

الدنيه سيوف بضلوعي سنته​

وقوانين التعب لجلي سنته​

الوادم تحتفل بآخر سنته​

وانه ابچي على العمر الراح من اديه​

============​

​

بفراكك جمر ابجي ونيران​

يل خدك يشع رحمه ونيران​

تمنيت العراق انتا وانا ايران​

وحدودك دوم فاتحهن عليه​

=========​

طفح بالكيل حبكم من تراكم​

وعليله اطيب صدك من تراكم​

على مد البصر شوكي من تراكم​

ويغطي ابعد بلاد على الوطيه​

==========​

يغطي الفرح والهم من تملها​

وروحي وياك هامت من تملها​

حكم بالموت تحكم من تملها​

مشت وختارت دروب المنيه​

========​

مشت بالهم تجاوب من سألها​

وتظل الناس تسأل من سألها​

لها بالخير مسعى من سألها​

رغم كل الالم والهم عليه​

============​

رغم كل الي لفاني من سحبكم​

حزين وجفني غيم من سحبكم​

انكطع بس بت بقالي من سحبكم​

كطع هالروح وكليبي سويه​

=====​

كطع والروح طلعت من سلتها​

وصبح فارغ عنبها من سلتها​

شتظن ردت جوابآ من سلتها​

تحبك لو تحط نارآ سريه​

==========​

أنه كلبي من لهيب الشوك منطر​

وتضل عيني على البيبان منطر​

شفت خدك عبالي الفجر منطر​

كمت صليت من غصبن عليه​

=======​

كحل بالعـــين أحـــــــــبابي يحطون​

أوياحربه أمسومره أبقصبى يحطون​

ياليت أهلك أبجــــنب أهلي يحطون​

نـــنام أثـنـيـــنا أونلتــــف سويه​

=====​

روى الزيتون من دمعي ولاراك​

أوغيرك مانحل جسمي ولاراك​

أخاف أطول غيبتكم ولاراك​

وعند وصلك تدانيني المنيه​

=======​

دمه دمع البيابي سال وانهات​

عليك اكضي العمر حسرات وانهات​

بهواك انه اعذلتني الناس وانهات​

ما خذني الهوه غصبن عليه​

============​

أره جدامك عن الجيات كطعن​

وسجاجين الهجر بحشاي كطعن​

أنا الماجوز عن هواك كطعن​

وانا بطرواك كل صبح ومسيه​

=======​

صرت مصباح بيدك مارد انه​

على ذلتك يخايب ماردانه​

بكثر حبك يكلبي ماردانه​

كلبي والجبد راحن بديه​

==========​

آنه من الجرح ما خاف لو سال​

يرى شامت واخاف شلون لو سال​

سيفك بالجذب لعداي لو سال​

علي هد واكولن هد اليه​

===========​

يهل غامض ودادك ماتبينه​

ونظل نترجه وصلك ماتبينه​

عدل بينه وتهمنه مات بينه​

الفرح مات ابجفاكم حزن بيه​

============​

امس وانه برغد نومي طفت بيك​

مثل ما طايف بروحي طفت بيك​

ابشرك نار البكلبي طفت بيك​

واشعل شمع من يمر اسمك عليه​

===========​

يصاحب من تماشي انسان كلبه​

ودور بالأساس وشوف كلبه​

اذا شفته اناني وبي كلبه​

تجنب ماوره غير الأذيه​

===========​

بسواد العين يسمر شفتك انه​

وادوخ من اضوكن شفتك انه​

بحبل جتفني حبك شفتك انه​

شما فكه يرد يلتف عليه​

============​

وراكم دوم امشي وانت جاري​

اريدك دوم يمي وانت جاري​

وني عليك اصلي ون تجاري​

مستورد فقط خصيص اليه​

==========​

احنا الما كطعنا بيوم وصلك​

لان شخصل نعرفة منين واصلك​

صيامك مايفيدك بعد وصلاك​

لان دم بركبتك ضل الية​

==========​

لاون ناسي الكتلني والدفني​

وخذت بالعشك فني ودي فني​

لون تدري انا شودي ودي افني​

ديار اهلك هذيج العلوطية​

==========​

​

وكع ميزاني من حملك ولك دك​

وكلبي المايدك لاحــــد الك دك​

جهازي اتصل من وحده والك دك​

لان اثنينة نعزك سوية​

=========​

​

​

دعيت الوكت يزهيلك ويسراك​

ورفيجك انه في عسرك ويسراك​

يمينك لو تعب وانشل ويسراك​

يروحلك ركض وصيت اديه​

=========​

​

جمد كلبي على بابك مو عجيبه​

عجبته وكلشي غيرك مو عجيبه​

تره السبع العجايب مو عجيبه​

صفر وي كارثه فركاك اليه​

==========​

الوكت تعبني والمصرف والايجار​

والغيري الدهر منصف والي جار​

الى صاحب ردت ودة والى جار​

يواعدني يجي ومامر علية​

=======​

سلطه وجاه الك يمي والك مال​

كلبي ماعشق غيرك ولك مال​

الله يساعد الراسب والاكمال​

والناجح الف رحمة على ابية​

======​

فر الكلب من شافك وهلهل​

غاب الكمر بغيابك وهل هل​

اجيتك لشرب الشربت وهلهل​

وتبقى وياي مهما النفس بيه​

============​

اكظي الليل احسب بس امني​

ولا ساعة الليالي بس امني​

ولك كافي يا زماني بس مني​

بمرامك والتريدة صار بية​

====​

دمع عيني يحلو الطول هامل​

شجاك الحبي يالمحبوب هامل​

اذا فد ازعلك كول هامل​

امل منك جذب يلعشت بيه​

============​

​

​

اجيت ولجل عينــك شاركتلك​

وعله دموعي دليلـــي شاركتلك​

بخت عنــــدي واحذرك شاركتلك​

اشور بيك مــن تبعد عليـــــه​

========​

اريد اكصد لعد كلبك وظــــيفه​

واحط حبي على حبك وظيـــيفه​

اذا هذا العشك صاير وظــــيفه​

ما اطلع تقاعد للمنيه​

==========​

الحزن لاجلك هويتة صار مني​

وليالي هواي بعدك صارمني​

شتريد الكلب؟ اخذة صار مني​

اخذ شتريد بس ارجع الية​

========​

​

​

​

صخر ما اذوب بس كوة اذب لك​

سكيتك وانا بيدي اكدر اذبلك​

يكلبي انوب اذا تعشك اذب لك​

نفط وبنار احركنك بدية​

==========​

صرت كلعود انا بكبرة ورفعة​

مشيت وما دريت امشي ورى افعى​

اذا شخصك يطيح اركض وارفعة​

من اطيحن ليش ماتركض علية​

=======​

بعلاقتنة منو الخربط وشر بك​

وجنت بيدي اوكلنك واشربك​

حقد شايل علي كلبك وشر بيك​

وتخالفنة وحلم نرجع سوية​

=========​

جبل ما الوذ والحب لوى اذاني​

وحبيبي ارضى باذيتة لو اذاني​

شكثر جف اعلة حبك لوى اذاني​

اتوب وتالي ارد غصبن علية​

=========​

الكلب معلول ومأيس من شفاه​

وعلى خدودي الدمع جاري من شفاه​

على الراح وحرم شفتي من شفاه​

وكطع حته بحلم ما مر عليه​

============​

روح ابعيد عني ولي يله​

وعلي من السمه منزل ولي الله​

حبك سم واجرعنه والي الله​

وتدير السم بديك شلون بيه​

​

 

خابط يا وكت ما يصفه بيك الراي

مثل خوان يوسف ذوله خوانك

[OZARK]

أنة ألشديت جرحك ليش حليت

عليـة وحلـة ألطـلاب حليت

ذكرتك بأمتحاني وغلط حليت

شجاوب وأنت شاغل حتى أدية




روعه فعلا
عاش الذوق وردة

 

[قارورة وفه]

أنة ألشديت جرحك ليش حليت

عليـة وحلـة ألطـلاب حليت

ذكرتك بأمتحاني وغلط حليت

شجاوب وأنت شاغل حتى أدية




روعه فعلا
عاش الذوق وردة

حضورك اروع شكرا الك

 

[أمجد]

اختيارات جميلة