سهم زعلك رماني وشتفه السفاح

[قارورة وفه]

هدوه بليل مرة گلبي ما مرتاح
شراييني أحسهن موت بيهن طاح
وأحس حتى الهوى كاتم على أنفاسي
وقفل صندوك گلبي وضيع المفتاح
زعلت الاحبه وصوچي زعلتهه
حسبالي الزعل ساعة ويرد بصياح
وسوسلي أبو مره الف ياحيف
عبره ماخذة من علة التفاح
بيدك سلمت حالي بعد هل الحال
تعال وشوف حالي ياضوه المصباح
احبك موت تدري وادري ما تقبل
أشمك شوك وأنت شمتك قداح
تعال الخاطر الله لا تضل أبعيد
رسيت بمرسه حبك وقبلت ملاح
يبحر والبحر روجاته والموجات
نضرتهن شماته وتخطف الأرواح
لا يفلان معقوله صخر گلبك
هيچ تعوف ولفك والوكت ذباح
ما بيه بعد احمل صبر يهواي
سهم زعلك رماني وشتفه السفاح
تعال ارفع المرسه الماي شاطي الحب
وخل تسري السفينه شما تهب أرياح
------
بقلمي === الشاعر هاني حماده​

 

[Gardi]

الله . عاشت ايدك

 

[سارة البابلية]

الله عليك وعلى رقيك
دمت بهذا الق المميز

 

[سليم البصري]

عاشت الايادي
ننتظر المزيد​