هلي / عريان السيد خلف
وبتنا كلوبنا ولايه وسوالفنا ضفيره
وشوكنا لدهله ومحبتنا وخبزنا ظنوننا
وخطارنا تراب الجزيره وديره ديره
الموت من يشرب الوادم ديرة ديرة
الفيض من يمحي المعالم ديره ديره
وصبّحت ياهلي على جفوني الخواطر غاليات
وطيفكم عاود على عيوني حنينه
وجرّعت روحي لاجلكم حنضل الوحشه
ولكيت الروح بالصفنات امينه
وذاك من ذاك اللكه النجمه العزيزه بلا سما ودكّلها عينه
وذاك من ذاك
اليحط كلبه على جفه ويغسل بآخر نزف وجه المدينه
وبينا بينا شما تعب لفّ المغازل بينا بينا
شما ثكل صوت الهلاهل بينا بينا
وجان جفّي يلاعب النسمه وذرى الكذله عشب
وجان كلبي يريد يكبر اكبر من اسمه من ذاته
ويكره ويشكى ويحب وجنت اسمّيكم الذمّه
وجنت اشيلنكم وصيه بغير حز ماتنكتب
عفية نهران شكثر خدران املها ومايها الراجد عذب
ومرّت الوحشه على جفوفي خرز سبحه
وتعب روجة بلم
وسالفه وضحكه بدويه تموت باطراف الندم
ومرت الظلمه تغش الشوف الابيض
والطوارش شماهوت هام البخت توكف علم
هلي وسيّرتوا عليه بوحشتي حجاية بريد وبيت نايل
مثل المصوّب الاهله مايدارونه
كلما يطيب الجرح عمداً يلجمونه
واشتهيتوني اكتبلكم عن وفا البردي
وحنين الناي ودموع السنابل
وعن العيون التلم الليل دمعة
وتعتلك وكت الوفا شموع ومشاعل
وعن الكلوب التموت بلااسم وبلاية راية
وعن شمس طلكت باسمها وعسّرت باول قضية
وغربتي وصوت النواعي يلوحني ويلتم باديّة
الصوت بي ريحة عيوني
وبي هلي ووحشة مسية
هلي يامن ضيّعوني
وكحة النفس ماتفعل تلين
منبت حزن ومخالف سنين
الليل لو سدّ الروازين
شمسين حمرة يخضّر الطين
هلي يامن ....وهي هي
العين من تكضي السوالف هي هي
الكاع من تجفي وتوالف هي هي
هلي وليلة حضنتنا بتعبنا بخوفنا بيوت العشيرة
وجان اول بيت ضحكة
وجان ثالث بيت رجفة
وجان سابع بيت عين
وجان دخان المواكد جلمة مروّة وهلا ونغطة جنين
وصوّغتنا عيونهم طابك دنان ولبن شجوة
وجلمة مكطوعة نفس طول السنين
وعين عين
انشدّت بتالي الطوارف عين عين
وعين عين
بلهفة تنشد عالسوالف عين عين
وعين لفّتنا بحزنها وزوّكت وجه الجرح
وعين هزّتنا ونختنا يغزر ويانه الملح
وعين نشدتنا : من اجيتوا , ما عثر بيكم صبح ؟
هلي وزتتنا الضماير والصفاير والخناجر والدفو الغطّا الجفوف
وجانت الهلهولة خرسة تضيع بالشفا وتطوف
الكاع من يكبر كلبها يشب عشبها
وتوصل حجاياتها لتالي الجروف
هلي وشرّعني هواكم باب للخطوة الغريبة
وخايرتني عيونكم :ذل ؟ لو جتل؟
وانه والموت التحمنا بمايكم ساك وحجل
الروح شاخص والعمر بركة كمر والموت ظل
ويه من كلبي رصاصة
وويه كل لهبة اصرخ بدمي اشتعل
الدنيا من يشح ضواها الدم بكل حيله يهل
هلي وآخر مكاتيبي كتبته الكم على الكاع
ابنكم باعته الدنيا ولا باع
وبتنا كلوبنا ولايه وسوالفنا ضفيره
وشوكنا لدهله ومحبتنا وخبزنا ظنوننا
وخطارنا تراب الجزيره وديره ديره
الموت من يشرب الوادم ديرة ديرة
الفيض من يمحي المعالم ديره ديره
وصبّحت ياهلي على جفوني الخواطر غاليات
وطيفكم عاود على عيوني حنينه
وجرّعت روحي لاجلكم حنضل الوحشه
ولكيت الروح بالصفنات امينه
وذاك من ذاك اللكه النجمه العزيزه بلا سما ودكّلها عينه
وذاك من ذاك
اليحط كلبه على جفه ويغسل بآخر نزف وجه المدينه
وبينا بينا شما تعب لفّ المغازل بينا بينا
شما ثكل صوت الهلاهل بينا بينا
وجان جفّي يلاعب النسمه وذرى الكذله عشب
وجان كلبي يريد يكبر اكبر من اسمه من ذاته
ويكره ويشكى ويحب وجنت اسمّيكم الذمّه
وجنت اشيلنكم وصيه بغير حز ماتنكتب
عفية نهران شكثر خدران املها ومايها الراجد عذب
ومرّت الوحشه على جفوفي خرز سبحه
وتعب روجة بلم
وسالفه وضحكه بدويه تموت باطراف الندم
ومرت الظلمه تغش الشوف الابيض
والطوارش شماهوت هام البخت توكف علم
هلي وسيّرتوا عليه بوحشتي حجاية بريد وبيت نايل
مثل المصوّب الاهله مايدارونه
كلما يطيب الجرح عمداً يلجمونه
واشتهيتوني اكتبلكم عن وفا البردي
وحنين الناي ودموع السنابل
وعن العيون التلم الليل دمعة
وتعتلك وكت الوفا شموع ومشاعل
وعن الكلوب التموت بلااسم وبلاية راية
وعن شمس طلكت باسمها وعسّرت باول قضية
وغربتي وصوت النواعي يلوحني ويلتم باديّة
الصوت بي ريحة عيوني
وبي هلي ووحشة مسية
هلي يامن ضيّعوني
وكحة النفس ماتفعل تلين
منبت حزن ومخالف سنين
الليل لو سدّ الروازين
شمسين حمرة يخضّر الطين
هلي يامن ....وهي هي
العين من تكضي السوالف هي هي
الكاع من تجفي وتوالف هي هي
هلي وليلة حضنتنا بتعبنا بخوفنا بيوت العشيرة
وجان اول بيت ضحكة
وجان ثالث بيت رجفة
وجان سابع بيت عين
وجان دخان المواكد جلمة مروّة وهلا ونغطة جنين
وصوّغتنا عيونهم طابك دنان ولبن شجوة
وجلمة مكطوعة نفس طول السنين
وعين عين
انشدّت بتالي الطوارف عين عين
وعين عين
بلهفة تنشد عالسوالف عين عين
وعين لفّتنا بحزنها وزوّكت وجه الجرح
وعين هزّتنا ونختنا يغزر ويانه الملح
وعين نشدتنا : من اجيتوا , ما عثر بيكم صبح ؟
هلي وزتتنا الضماير والصفاير والخناجر والدفو الغطّا الجفوف
وجانت الهلهولة خرسة تضيع بالشفا وتطوف
الكاع من يكبر كلبها يشب عشبها
وتوصل حجاياتها لتالي الجروف
هلي وشرّعني هواكم باب للخطوة الغريبة
وخايرتني عيونكم :ذل ؟ لو جتل؟
وانه والموت التحمنا بمايكم ساك وحجل
الروح شاخص والعمر بركة كمر والموت ظل
ويه من كلبي رصاصة
وويه كل لهبة اصرخ بدمي اشتعل
الدنيا من يشح ضواها الدم بكل حيله يهل
هلي وآخر مكاتيبي كتبته الكم على الكاع
ابنكم باعته الدنيا ولا باع
